– జర్నలిస్టుల కుటుంబ సమ్మేళనంలో మంత్రి కోమటిరెడ్డి వెంకట్ రెడ్డి
– సామాజిక బాధ్యతను గుర్తుచేసిన సందేశం
– జర్నలిస్టులతో కలిసి ప్రజాసేవకు కొత్త ప్రతిజ్ఞ
హైదరాబాద్, 16 నవంబర్ (మనప్రజాప్రతినిధి):
ఎక్స్పీరియం ఎకో పార్క్లో ప్రెస్ క్లబ్ ఆధ్వర్యంలో నిర్వహించిన జర్నలిస్టు ఫ్యామిలీస్ గెట్ టు గెదర్ కార్యక్రమంలో మంత్రి కోమటిరెడ్డి వెంకట్ రెడ్డి పాల్గొన్నారు. వార్తా ప్రతినిధుల కుటుంబాలతో కలిసి సన్నిహితంగా గడపడం పట్ల తనకు ఎంతో ఆనందంగా ఉందని ఈ సందర్భంగా మంత్రి తెలిపారు.మీడియా ప్రతినిధులు ప్రతిరోజూ సామాజిక సమస్యలను నిష్పక్షపాతంగా ప్రజల ముందుకు తీసుకువస్తూ ప్రజాస్వామ్యాన్ని బలోపేతం చేస్తున్నారని మంత్రి పేర్కొన్నారు. ప్రజల కోసం పనిచేసే జర్నలిస్టుల వెనుక నిలబడే కుటుంబ సభ్యుల సహకారాన్ని ఆయన ప్రత్యేకంగా అభినందించారు.జర్నలిస్టుల కృషిని గౌరవిస్తూ, వారి పట్ల కృతజ్ఞత వ్యక్తం చేసిన మంత్రి, భవిష్యత్తులో వారితో కలిసి మరిన్ని ప్రజాసేవా కార్యక్రమాలు చేపట్టాలని సంకల్పబద్ధత వ్యక్తం చేశారు. సమాజంలో అవగాహన పెంపొందించడంలో మీడియా కీలక పాత్రను కొనసాగించాలని ఆయన ఆకాంక్షించారు.కార్యక్రమంలో జర్నలిస్టుల కుటుంబాలు ఉత్సాహంగా పాల్గొని సాంస్కృతిక కార్యక్రమాలతో వేదికను అలరించారు. కార్యక్రమాన్ని విజయవంతంగా నిర్వహించిన ప్రెస్ క్లబ్ నిర్వాహకులను మంత్రి అభినందించారు.