“పోలీసులంటే భయం కాదు.. భరోసా: విద్యార్థులకు అవగాహన.
“అమరవీరుల త్యాగాలు, పోలీసుల విధులపై అవగాహన
మనప్రజాప్రతినిధి//సిద్దిపేటరూరల్,అక్టోబర్24:
పోలీస్ అమరవీరుల సంస్మరణ దినోత్సవం సందర్భంగా నిర్వహిస్తున్న కార్యక్రమాల్లో భాగంగా సిద్దిపేట రూరల్ పోలీస్ స్టేషన్‌లో శుక్రవారం ప్రత్యేకంగా ఓపెన్ హౌస్ కార్యక్రమాన్ని నిర్వహించారు. ఈ కార్యక్రమంలో భాగంగా సిద్దిపేటకు చెందిన మాస్టర్ మైండ్స్ ఇంగ్లీష్ మీడియం స్కూల్‌కు చెందిన సుమారు 70 మంది విద్యార్థినీ విద్యార్థులు తమ ఉపాధ్యాయులతో కలిసి పోలీస్ స్టేషన్‌ను సందర్శించారు.
ఈ సందర్భంగా పోలీస్ అధికారులు విధి నిర్వహణలో ప్రాణాలర్పించిన పోలీస్ అమరవీరుల త్యాగాలను విద్యార్థులకు వివరించారు. సమాజంలో శాంతిభద్రతల పరిరక్షణ, ప్రజల రక్షణ కోసం పోలీసులు రాత్రింబవళ్లు నిర్వహిస్తున్న విధుల గురించి అవగాహన కల్పించారు.
పోలీస్ స్టేషన్ పనితీరుపై అవగాహన
ఓపెన్ హౌస్ కార్యక్రమంలో భాగంగా విద్యార్థులకు పోలీస్ స్టేషన్‌లోని వివిధ విభాగాల పనితీరును ప్రత్యక్షంగా వివరించారు. స్టేషన్ హౌస్ ఆఫీసర్, రైటర్, రిసెప్షన్, లాకప్ గదుల నిర్వహణ విధానాన్ని తెలియజేశారు.
అలాగే పోలీసులు విధి నిర్వహణలో ఉపయోగించే వివిధ రకాల ఆయుధాలు, వాకీటాకీలు, బుల్లెట్‌ప్రూఫ్ జాకెట్లను విద్యార్థులకు చూపించి వాటి వినియోగంపై అవగాహన కల్పించారు.
అత్యవసర సేవలపై అవగాహన
అత్యవసర పరిస్థితుల్లో 112కు ఫోన్ చేయడం, మహిళల భద్రత కోసం అందుబాటులో ఉన్న సాంకేతిక సేవలు, అత్యవసర సమయంలో పోలీసులు ఎలా స్పందిస్తారనే అంశాలపై విద్యార్థులకు ప్రత్యక్షంగా వివరించారు.
అదేవిధంగా పెరుగుతున్న సైబర్ నేరాలు, ఆన్‌లైన్ మోసాలు, సామాజిక మాధ్యమాల వినియోగంలో తీసుకోవాల్సిన జాగ్రత్తలపై విద్యార్థులకు అవగాహన కల్పించారు.
చిన్నతనం నుంచే విద్యార్థులకు చట్టాలపై అవగాహన కల్పించడం, పోలీసుల పట్ల ఉన్న భయాన్ని తొలగించి పోలీసులు–ప్రజల మధ్య స్నేహపూర్వక సంబంధాలను పెంపొందించడంతో పాటు సామాజిక బాధ్యతను పెంచడమే ఓపెన్ హౌస్ కార్యక్రమం ముఖ్య ఉద్దేశమని సబ్‌ఇన్‌స్పెక్టర్ తెలిపారు.
పోలీస్ అధికారుల వివరణతో విద్యార్థులు ఎంతో ఆసక్తిగా తమ సందేహాలను నివృత్తి చేసుకున్నారు. ఈ కార్యక్రమంలో సీహెచ్ విద్యాసాగర్ సీఐ, చంద్రమోహన్ ఎస్‌ఐ (చిన్నకోడూరు),జి.నవత. ఎస్‌ఐ (సిద్దిపేట రూరల్)తో పాటు పోలీస్ సిబ్బంది పాల్గొన్నారు