– యూపీ ముఖ్యమంత్రిని మర్యాదపూర్వకంగా కలిసిన చిత్రబృందం
లక్నో, నవంబర్ 24,మనప్రజాప్రతినిధి:
నందమూరి బాలకృష్ణ, బోయపాటి శ్రీను కలయికలో రూపొందుతున్న ‘అఖండ 2 – తాండవం’ సినిమా దేశవ్యాప్తంగా భారీ స్థాయిలో చర్చకు దారి తీస్తోంది. తొలి భాగం సాధించిన సంచలన విజయం తర్వాత ఈ సీక్వెల్పై ప్రేక్షకుల్లో ఏర్పడిన అంచనాలు మరింత పెరిగాయి. తాజాగా విడుదలైన ప్రచార చిత్రకళలు, ముందస్తు దృశ్యాలు సామాజిక మాధ్యమాల్లో రికార్డు స్థాయి స్పందన తెచ్చుకుంటుండటంతో సినిమాపై ఉత్సుకత రోజురోజుకూ పెరుగుతోంది.
డిసెంబర్ 5న దేశవ్యాప్తంగా విడుదలకు సిద్ధమవుతున్న ఈ సినిమాకు సంబంధించిన ప్రచార కార్యక్రమాలు అన్ని రాష్ట్రాల్లో వేగంగా జరుగుతున్నాయి. ముంబయి, విశాఖలో గీతాల ఆవిష్కరణ, హైదరాబాద్లో ప్రత్యేక నిర్వహణ, కర్ణాటకలో ట్రైలర్ ప్రదర్శనలతో పాటు ఉత్తరాది ప్రాంతాల్లో కూడా విస్తృత ప్రచారం చేపట్టారు. భక్తి, ధర్మం, ఆధ్యాత్మికతను కథా కేంద్రంగా చేసుకుని ప్రచార విధానాన్ని ప్రత్యేకంగా రూపొందించడం విశేషంగా మారింది.
ఈ ప్రచారాల్లో భాగంగా చిత్రబృందం ఉత్తరప్రదేశ్ ముఖ్యమంత్రి యోగి ఆదిత్యనాథ్ను లక్నోలో మర్యాదపూర్వకంగా కలిసింది. దర్శకుడు బోయపాటి శ్రీను సినిమాలోని ముఖ్య దృశ్యాల నేపథ్యాన్ని, కథా తత్వాన్ని ఆయనకు వివరించారు. ధర్మం, శక్తి, భక్తి వంటి అంశాలపై ఆధారపడిన కథను విన్న యోగి ఆదిత్యనాథ్ ఆసక్తి వ్యక్తం చేసినట్లు సమాచారం.
సమావేశంలో బాలకృష్ణ సినిమాలో ఉపయోగించిన త్రిశూలంను స్మారకంగా ముఖ్యమంత్రికి అందజేశారు. ఇది సమావేశంలో ప్రధాన ఆకర్షణగా నిలిచింది. ఈ భేటీకి సంబంధించిన చిత్రాలు ఇప్పటికే సామాజిక మాధ్యమాల్లో విస్తృతంగా వైరలవుతున్నాయి. ఉత్తర భారతంలో కూడా సినిమాపై ఆసక్తి మరింత పెరుగుతోందని చిత్ర పరిశ్రమ వర్గాలు అభిప్రాయపడుతున్నాయి.
అంతేకాక యూపీలో జరిగిన మహాకుంభమేల సమయంలో సినిమాకి సంబంధించిన కొన్ని కీలక దృశ్యాలను చిత్రీకరించిన విషయం కూడా ఈ సందర్భంగా ప్రస్తావనకు వచ్చింది. ఆ సన్నివేశాలపై ముఖ్యమంత్రి ప్రత్యేక ఆసక్తి చూపినట్లు సమాచారం. ప్రచార వేగం, ప్రేక్షకుల్లో ఆసక్తి, పాన్ఇండియా స్థాయిలో ఏర్పడిన హైప్ను బట్టి చూస్తే ‘అఖండ 2’ బాలకృష్ణ కెరీర్లోనే అత్యధిక ప్రారంభ వసూళ్లు సాధించే చిత్రంగా నిలవవచ్చని సినీ వర్గాల్లో చర్చ జోరుగా సాగుతోంది.
అఖండ 2 ప్రచారంలో ఊపందుకున్న పాన్ఇండియా ప్రస్థానం..
