మానసిక ఆరోగ్యంపై తెలంగాణ పోలీస్ సందేశం

📰 Generate e-Paper Clip

– సహాయం కోరడం బలహీనత కాదు బాధ్యత
– అవగాహనతోనే అపహాస్యానికి ముగింపు

(హైదరాబాద్, నవంబర్ 15) (మనప్రజాప్రతినిధి):
మానసిక ఆరోగ్యం కూడా శారీరక ఆరోగ్యంతో సమానంగా ముఖ్యమన్న విషయాన్ని తెలంగాణ పోలీస్ బలంగా చాటింది. సమాజంలో మానసిక ఒత్తిడి, డిప్రెషన్, ఆందోళన వంటి సమస్యలు పెరుగుతున్న నేపథ్యంలో, ప్రజలు ఈ సమస్యలను తగ్గించుకోటానికి ముందుకొచ్చేలా ప్రోత్సాహించే దిశగా ఈ సందేశాన్ని విడుదల చేశారు. ప్రతి వ్యక్తి మానసికంగా బలంగా ఉండటం ద్వారా కుటుంబాలు, పాఠశాలలు, కార్యాలయాలు మరియు మొత్తం సమాజం మరింత సురక్షితంగా మారుతుందని పోలీసులు పేర్కొన్నారు.ప్రజలు తమ భావాలను బయటపెట్టడం, అవసరమైతే నిపుణుల సహాయం పొందడం ఎంతో అవసరమని అధికారులు తెలిపారు. సమస్యలను దాచిపెట్టడం వల్ల ఒత్తిడి మరింత పెరిగి ప్రమాదకర పరిస్థితులకు దారితీసే అవకాశం ఉందని హెచ్చరించారు. తన మనసు మాట చెప్పడం ధైర్యానికి నిదర్శనమని, ‘సహాయం కోరడం బలహీనత కాదని’ తెలంగాణ పోలీస్ స్పష్టం చేస్తోంది.
మానసిక ఆరోగ్య సమస్యలను చుట్టుముట్టే అపహాస్యం, అజ్ఞానం, భయం వంటి అంశాలను తొలగించడానికి సమాజం మొత్తం కలిసికట్టుగా ముందుకు రావాలని పోలీసులు పిలుపునిచ్చారు. కుటుంబ సభ్యులు, సహోద్యోగులు, స్నేహితులు పరస్పరం అండగా నిలిస్తే అనేక సమస్యలు నివారించవచ్చని వారు పేర్కొన్నారు. సమస్యలను అర్థం చేసుకోవడం, కనీసం ఓపికగా వినడం కూడా ఒకరికొకరు పెద్ద సహాయంగా మారుతుందని తెలిపారు.
మానసిక ఆరోగ్యంపై అవగాహన పెంచే ఈ ప్రచారంతో సమాజంలో సానుకూల మార్పులు రావాలని తెలంగాణ పోలీస్ ఆశాభావాన్ని వ్యక్తం చేసింది. బలమైన మనసులు ఉన్నప్పుడే సురక్షిత సమాజం ఏర్పడుతుందని, అందరూ కలిసి మానసిక ఆరోగ్యంపై ఉన్న అపహాస్యానికి ముగింపు పలకాలని పోలీసులు పిలుపునిచ్చారు.