బిచ్కుంద ఎక్సైజ్ ఇన్‌స్పెక్టర్‌ ఏసీబీ వలలో

📰 Generate e-Paper Clip

మనప్రజాప్రతినిధి//కామారెడ్డి జిల్లా బిచ్కుంద

కామారెడ్డి జిల్లా బిచ్కుంద లో విధులు నిర్వహిస్తున్న ప్రొహిబిషన్ & ఎక్సైజ్ ఇన్‌స్పెక్టర్  సత్యనారాయణను అవినీతి నిరోధక శాఖ (ఏసీబీ) అధికారులు శుక్రవారం లంచం తీసుకుంటూ రంగే చేతిలో పట్టుకున్నారు.ఏసీబీ అధికారులు తెలిపిన వివరాల ప్రకారం, ఫిర్యాదుదారుని నుంచి అధికారిక అనుకూలత కోసం రూ.2 లక్షలు డిమాండ్ చేసిన ఇన్‌స్పెక్టర్, తన అద్దె ఇంటిలోనే ఆ మొత్తాన్ని స్వీకరిస్తుండగా అధికారులు దాడి చేసి పట్టుకున్నారు. గ్రామాల్లోని తాటి కళ్ల దుకాణాలను తరలించకుండా చూడటం, కొత్త కేసులు నమోదు చేయకుండా ఉండటం, అలాగే ఆ వ్యాపారాలు ఎలాంటి అంతరాయం లేకుండా కొనసాగేందుకు సహకరించడం కోసం ఈ లంచాన్ని తీసుకున్నట్లు విచారణలో వెల్లడైంది.దాడి సందర్భంగా ఇన్‌స్పెక్టర్ వద్ద అదనంగా రూ.45,760 నగదు లభ్యమైంది. ఈ మొత్తానికి సంబంధించి సరైన లెక్కలు చూపలేకపోయినట్లు అధికారులు తెలిపారు.ప్రభుత్వ ఉద్యోగిగా విధులను నిజాయితీగా నిర్వహించాల్సిన బాధ్యతను విస్మరించి, అక్రమంగా లంచం స్వీకరించినందుకు  సత్యనారాయణపై కేసు నమోదు చేసినట్లు ఏసీబీ పేర్కొంది. ఫిర్యాదుదారుని వివరాలను భద్రతా కారణాల రీత్యా గోప్యంగా ఉంచినట్లు తెలిపింది.నిందితుడిని అరెస్ట్ చేసి హైదరాబాద్ నాంపల్లి లోని ప్రత్యేక ఏసీబీ కోర్టులో హాజరుపరచనున్నట్లు అధికారులు వెల్లడించారు. ఈ కేసు దర్యాప్తు కొనసాగుతోంది.ప్రభుత్వ ఉద్యోగులు లంచం డిమాండ్ చేసిన సందర్భాల్లో ప్రజలు టోల్ ఫ్రీ నంబర్ 1064కు సమాచారం అందించాలని ఏసీబీ విజ్ఞప్తి చేసింది. ఫిర్యాదుదారుల వివరాలు పూర్తిగా గోప్యంగా ఉంచబడతాయని అధికారులు తెలిపారు.