భారత్ చైనా నిల్వలు
పాక్ సామర్థ్య విస్తరణ యత్నం
ప్రపంచ భద్రతపై ఆందోళన
న్యూఢిల్లీ, జూన్ 8 (మనప్రజాప్రతినిధి):
ప్రపంచవ్యాప్తంగా అణ్వాయుధ పోటీ మరింత వేగం పుంజుకుంటున్నట్లు తాజా అంతర్జాతీయ శాంతి పరిశోధనా సంస్థ నివేదిక వెల్లడించింది. ముఖ్యంగా భారత్, పాకిస్థాన్ దేశాలు కొత్త తరహా అణ్వాయుధ రవాణా వ్యవస్థలను అభివృద్ధి చేస్తున్నాయని నివేదిక పేర్కొంది. అదే సమయంలో బాలిస్టిక్ క్షిపణులకు అణు వార్హెడ్లను అమర్చే సామర్థ్యాన్ని కూడా ఈ రెండు దేశాలు మెరుగుపరుచుకున్నట్లు వెల్లడించింది. ప్రపంచ భద్రతా పరిస్థితుల నేపథ్యంలో ఈ పరిణామాలు అంతర్జాతీయ స్థాయిలో చర్చనీయాంశంగా మారాయి. నివేదిక ప్రకారం జనవరి 2026 నాటికి భారత్ వద్ద సుమారు 190 అణ్వాయుధాలు ఉన్నట్లు అంచనా వేస్తున్నారు. గత ఏడాదితో పోలిస్తే ఈ సంఖ్య స్వల్పంగా పెరిగినట్లు పేర్కొన్నారు. మరోవైపు చైనా అణ్వాయుధ నిల్వలను మరింత వేగంగా విస్తరించుకుంటోంది. ప్రస్తుతం ఆ దేశం వద్ద సుమారు 620 అణు వార్హెడ్లు ఉన్నట్లు అంచనా. గత ఏడాది ఈ సంఖ్య 600 మాత్రమే ఉండగా, ఏడాది వ్యవధిలోనే మరో ఇరవై ఆయుధాలు పెరిగినట్లు నివేదిక వెల్లడించింది.
భారత్ తన వైమానిక దళ యుద్ధ విమానాలు, భూమి నుంచి ప్రయోగించే క్షిపణులు, అణ్వాయుధ సామర్థ్యం కలిగిన జలాంతర్గాముల ద్వారా అణు నిరోధక శక్తిని మరింత బలోపేతం చేస్తున్నట్లు నివేదిక తెలిపింది. ఇప్పటికే ఉన్న ఆయుధ వ్యవస్థలతో పాటు భవిష్యత్ అవసరాల కోసం అదనపు వార్హెడ్ల తయారీ కూడా కొనసాగుతున్నట్లు పేర్కొంది. ముఖ్యంగా దీర్ఘశ్రేణి క్షిపణి వ్యవస్థల అభివృద్ధిపై భారత్ ప్రత్యేక దృష్టి సారించినట్లు వెల్లడించింది. చైనాతో సరిహద్దు ఉద్రిక్తతలు, పాకిస్థాన్తో కొనసాగుతున్న భద్రతా సవాళ్లను దృష్టిలో పెట్టుకొని భారత్ తన వ్యూహాత్మక ప్రణాళికలను రూపొందిస్తున్నట్లు నివేదికలో పేర్కొన్నారు. అణ్వాయుధాలను మోసుకెళ్లగల క్షిపణులు, జలాంతర్గాముల సామర్థ్యాలను పెంచడం ద్వారా బలమైన నిరోధక శక్తిని కొనసాగించాలని భారత్ లక్ష్యంగా పెట్టుకున్నట్లు తెలుస్తోంది.
ఇక పాకిస్థాన్ విషయానికి వస్తే జనవరి 2026 నాటికి ఆ దేశం వద్ద సుమారు 170 అణు వార్హెడ్లు ఉన్నట్లు నివేదిక వెల్లడించింది. ప్రస్తుతం అణ్వాయుధాల సంఖ్యలో పెద్ద మార్పు కనిపించకపోయినా, భవిష్యత్తులో తన అణు సామర్థ్యాన్ని మరింత విస్తరించే దిశగా పాకిస్థాన్ ప్రయత్నాలు కొనసాగిస్తున్నట్లు పేర్కొంది. భూమి, వైమానిక రంగాల్లో ఇప్పటికే సామర్థ్యం కలిగిన పాకిస్థాన్, సముద్ర ఆధారిత అణు నిరోధక శక్తిని కూడా అభివృద్ధి చేసేందుకు కృషి చేస్తున్నట్లు వివరించింది. ప్రపంచవ్యాప్తంగా జనవరి 2026 నాటికి మొత్తం 12,187 అణ్వాయుధాలు ఉన్నట్లు నివేదిక అంచనా వేసింది. వీటిలో 9,745 ఆయుధాలు సైనిక నిల్వల్లో ఉండగా, 4,012 ఆయుధాలు క్షిపణులు, యుద్ధ విమానాల్లో మోహరించిన స్థితిలో ఉన్నట్లు వెల్లడించింది. రష్యా, అమెరికా దేశాలు అత్యధిక సంఖ్యలో అణ్వాయుధాలను అత్యవసర సిద్ధస్థితిలో ఉంచినట్లు నివేదిక తెలిపింది. అదే సమయంలో భారత్, చైనా దేశాలు కూడా తమ అణు సామర్థ్యాన్ని మరింత అప్రమత్త స్థాయిలో నిర్వహిస్తున్నట్లు పేర్కొంది. ఈ పరిణామాలు ప్రపంచ భద్రతా వాతావరణంపై కొత్త ఆందోళనలకు దారితీస్తున్నాయని నిపుణులు అభిప్రాయపడుతున్నారు.
