– అర్ధరాత్రి ఘటనతో జూబ్లీహిల్స్లో కలకలం
– అప్రమత్తతతో తప్పిన ప్రమాదం
హైదరాబాద్, జనవరి 8 (మనప్రజాప్రతినిధి):
వీకే సింగ్ నివాసం వద్ద అర్ధరాత్రి ఓ దుండగుడు హల్చల్ సృష్టించాడు. హైదరాబాద్లోని జూబ్లీహిల్స్ ప్రాంతంలో ఉన్న ఆయన ఇంటిపై దాడికి యత్నించిన ఘటన నిన్న అర్ధరాత్రి చోటుచేసుకుంది. అకస్మాత్తుగా జరిగిన ఈ పరిణామంతో స్థానికంగా తీవ్ర ఉత్కంఠ నెలకొంది.
సమాచారం ప్రకారం, ఇంటి వద్ద విధులు నిర్వహిస్తున్న సెక్యూరిటీ సిబ్బంది నుంచి ఆయుధాన్ని లాక్కునే ప్రయత్నం దుండగుడు చేశాడు. ఈ క్రమంలో వెంటనే అప్రమత్తమైన ఇతర సెక్యూరిటీ సిబ్బంది అతడిని అదుపులోకి తీసుకున్నారు. వారి చురుకైన చర్యల వల్ల ఎలాంటి ప్రాణ నష్టం జరగకుండా ప్రమాదం తప్పినట్లు తెలుస్తోంది.
ఈ ఘటనపై జూబ్లీహిల్స్ పోలీస్ స్టేషన్లో ఫిర్యాదు నమోదు చేశారు. నిందితుడిని ప్రాథమికంగా గుర్తించినట్లు పోలీసులు తెలిపారు. ఘటనకు గల కారణాలు, దుండగుడి ఉద్దేశాలపై పూర్తి వివరాలు ఇంకా తెలియాల్సి ఉందని పేర్కొన్నారు. పోలీసులు కేసు నమోదు చేసి దర్యాప్తు కొనసాగిస్తున్నారు.
