– మద్యం విధానం వెనుక అసలు రాజకీయం ఏంటి?
– మద్యం ద్వారా ఆదాయం, ప్రజల జీవితాలపై ప్రభావం
– నిషేధ హామీలు, అమల్లో సడలింపులు
గంజాయి శ్రీనివాస్,జనవరి 22 (మనప్రజాప్రతినిధి):
రాష్ట్ర రాజకీయాల్లో మద్యం విధానం ఎప్పటికప్పుడు పెద్ద చర్చకు దారి తీస్తున్న అంశంగా మారింది. అధికారంలోకి రాకముందు మద్యం నియంత్రణ, నిషేధం, సామాజిక బాధ్యత అంటూ హామీలు ఇస్తున్న ప్రభుత్వాలు… అధికారంలోకి వచ్చిన తర్వాత మాత్రం ఆదాయ అవసరాల పేరుతో అదే విధానాలను సడలిస్తున్నాయన్న విమర్శలు వెల్లువెత్తుతున్నాయి. మద్యం అమ్మకాల ద్వారా ప్రభుత్వ ఖజానాకు వచ్చే ఆదాయం ఒక వైపు ఉంటే, మరో వైపు అదే మద్యం వల్ల పేద కుటుంబాల జీవితం ఛిన్నాభిన్నమవుతోందన్న వాస్తవం కళ్ల ముందు నిలుస్తోంది.మద్యం ద్వారా వచ్చే ఆదాయం ప్రభుత్వానికి కీలకమని చెప్పుకుంటూనే, మద్యం వల్ల ఏర్పడుతున్న సామాజిక సమస్యలపై తగిన శ్రద్ధ చూపడం లేదన్న ఆరోపణలు వినిపిస్తున్నాయి. ధరలు పెంచడం, దుకాణాల సంఖ్య తగ్గించడం వంటి చర్యలు తీసుకున్నప్పటికీ, అక్రమ మద్యం, బెల్ట్ షాపులు పెరుగుతుండటంతో పరిస్థితి మరింత ప్రమాదకరంగా మారుతోందని సామాజిక వర్గాలు ఆందోళన వ్యక్తం చేస్తున్నాయి. నియంత్రణ చర్యలు బలహీనంగా ఉండటమే ఇందుకు ప్రధాన కారణమని వారు చెబుతున్నారు.
ఎన్నికల సమయం దగ్గరపడగానే మద్యం నిషేధం అంశం రాజకీయ ఆయుధంగా మారుతోందన్న విమర్శలు కూడా ఉన్నాయి. ప్రజల మనోభావాలను ఆకర్షించేందుకు హామీలు ఇచ్చి, తర్వాత వాటిని పక్కన పెట్టడం రాజకీయ ద్వంద్వ వైఖరికి నిదర్శనమని విశ్లేషకులు అభిప్రాయపడుతున్నారు. ముఖ్యంగా మద్యం వల్ల కుటుంబాల్లో జరిగే గొడవలు, ఆర్థిక నష్టాలు, మహిళలు ఎదుర్కొనే ఇబ్బందులపై ప్రభుత్వ విధానాలు సరైన పరిష్కారం చూపడం లేదన్న భావన బలపడుతోంది.మద్యం విధానం నిజంగా ప్రజా సంక్షేమం కోసమా? లేక రాజకీయ ప్రయోజనాలు, ఖజానా ఆదాయాల కోసమా? అన్న ప్రశ్నకు ఇప్పటికీ స్పష్టమైన సమాధానం కనిపించడం లేదు. లక్షలాది కుటుంబాల భవిష్యత్తును ప్రభావితం చేసే ఈ అంశాన్ని రాజకీయ లెక్కలకే పరిమితం చేయకుండా, దీర్ఘకాలిక సామాజిక ప్రయోజనాలను దృష్టిలో పెట్టుకుని నిర్ణయాలు తీసుకునే రోజు ఎప్పుడొస్తుందన్నదే ఇప్పుడు ప్రజల మధ్య ప్రధాన చర్చగా మారింది.
రాజకీయ లెక్కల మధ్య నలిగిపోతున్న కుటుంబాలు
