జనగణనకు ముందు పౌర పట్టిక నవీకరణ డిమాండ్
రెండు రోజుల సార్వత్రిక సమ్మెకు పిలుపు
పలు జిల్లాల్లో రహదారుల దిగ్బంధనం
మూడు రోజుల పాటు విద్యాసంస్థల మూసివేత
ఇంఫాల్,ఆగస్టు21(మనప్రజాప్రతినిధి): బీజేపీ పాలిత మణిపూర్లో మరోసారి నిరసనల జ్వాలలు రగిలాయి. రాష్ట్రంలో జనాభా గణన చేపట్టే ముందు జాతీయ పౌర పట్టికను నవీకరించాలని వివిధ సామాజిక సంస్థలు డిమాండ్ చేస్తుండటంతో పరిస్థితి ఉద్రిక్తంగా మారింది. అంతర్గతంగా స్థానభ్రంశం చెందిన ప్రజలు తమ స్వస్థలాలకు తిరిగి చేరే వరకు జనగణన నిర్వహించకూడదని ఆందోళనకారులు పట్టుబడుతున్నారు. ఈ డిమాండ్ల సాధన కోసం న్యాయమైన, నిష్పక్షపాత పునర్విభజన ప్రచార సంస్థ ఆధ్వర్యంలో ఉద్యమం కొనసాగుతోంది. ఈ నేపథ్యంలో 48 గంటల సార్వత్రిక సమ్మెకు పిలుపునిచ్చిన ఉద్యమకారులు మణిపూర్ లోయ ప్రాంతంలోని పలు జిల్లాల్లో భారీ నిరసన కార్యక్రమాలు నిర్వహించారు. ఇంఫాల్ వెస్ట్, ఇంఫాల్ ఈస్ట్, బిష్ణుపూర్, తౌబల్ జిల్లాల్లో అనేక ప్రాంతాల్లో రహదారులను దిగ్బంధించి రాకపోకలకు అంతరాయం కలిగించారు. దీంతో సాధారణ ప్రజల జీవనం తీవ్రంగా ప్రభావితమైంది.
ఇంఫాల్ తూర్పు జిల్లాలోని ఖురాయ్ లామ్లాంగ్ ప్రాంతంలో నిరసనకారులు రాష్ట్ర ముఖ్యమంత్రి ఖేమ్చంద్ సింగ్, హోం శాఖ మంత్రి గోవిందాస్ కొంతౌజమ్ల దిష్టిబొమ్మలను దహనం చేశారు. ప్రభుత్వ విధానాలపై తీవ్ర ఆగ్రహం వ్యక్తం చేసిన ఆందోళనకారులు తమ డిమాండ్లు నెరవేరే వరకు పోరాటాన్ని కొనసాగిస్తామని హెచ్చరించారు. సార్వత్రిక సమ్మెలో భాగంగా ప్రభుత్వ కార్యాలయాలను కూడా బహిష్కరించాలని ఉద్యమకారులు నిర్ణయించారు. గురువారం నుంచి అన్ని ప్రభుత్వ కార్యాలయాల కార్యకలాపాలకు దూరంగా ఉండాలని పిలుపునిచ్చారు. దీంతో ప్రభుత్వ యంత్రాంగంపై కూడా ప్రభావం పడే అవకాశం ఉందని అధికారులు భావిస్తున్నారు.
ప్రస్తుత పరిస్థితులను దృష్టిలో ఉంచుకుని శాంతిభద్రతల పరిరక్షణకు రాష్ట్ర ప్రభుత్వం కీలక నిర్ణయం తీసుకుంది. ఆగస్టు 20 నుంచి 22 వరకు రాష్ట్రంలోని అన్ని పాఠశాలలు, కళాశాలలు, ఇతర విద్యాసంస్థలను మూసివేస్తున్నట్లు ప్రకటించింది. విద్యార్థుల భద్రత దృష్ట్యా ఈ నిర్ణయం తీసుకున్నట్లు ప్రభుత్వం వెల్లడించింది. అదేవిధంగా తౌబల్ జిల్లాలో నిర్వహించాల్సిన జనగణన శిక్షణా కార్యక్రమాన్ని కూడా రద్దు చేసినట్లు అధికారులు తెలిపారు. నిరసనలు మరింత ఉధృతమయ్యే అవకాశాల నేపథ్యంలో ప్రభుత్వం పరిస్థితిని నిశితంగా పరిశీలిస్తోంది. రాష్ట్రంలో శాంతిభద్రతల పరిస్థితి పూర్తిగా సాధారణ స్థితికి వచ్చే వరకు అప్రమత్తంగా వ్యవహరిస్తామని అధికారులు పేర్కొన్నారు.
మణిపూర్లో మళ్లీ చెలరేగిన నిరసనలు
RELATED ARTICLES
