విద్యార్థుల తక్కువ బడ్జెట్ చిత్రానికి భట్టి విక్రమార్క ప్రశంసలు
ప్రపంచస్థాయి ఫిల్మ్ మేకింగ్ కోసం అన్నపూర్ణ స్టూడియోస్ సంకల్పం
సృజనాత్మక రంగానికి తెలంగాణ ప్రభుత్వ మద్దతుకు నాగార్జున కృతజ్ఞత
హైదరాబాద్, 22 నవంబర్ (మనప్రజాప్రతినిధి):
అన్నపూర్ణ ఫిల్మ్ అండ్ మీడియా కళాశాలలో తెలంగాణ ఉపముఖ్యమంత్రి భట్టి విక్రమార్కకు ఆతిథ్యమిచ్చిన సందర్భంగా కళాశాలలో ప్రత్యేక కార్యక్రమం నిర్వహించారు. ప్రముఖ నటుడు నాగార్జున ఉపముఖ్యమంత్రిని స్వాగతించి, అక్కడి విద్యార్థుల రూపొందించిన తక్కువ బడ్జెట్ చిత్రం గురించి వివరించారు. విద్యార్థుల కృషి, నైపుణ్యాన్ని చూసి భట్టి విక్రమార్క ప్రత్యేకంగా ప్రశంసించారు. యువతలో ఉన్న సృజనాత్మక సామర్థ్యాన్ని గుర్తిస్తూ, ప్రపంచ స్థాయి ఫిల్మ్ ఎడ్యుకేషన్ అభివృద్ధికి తెలంగాణ ప్రభుత్వం చేస్తున్న పనిని వివరించారు. విద్యా–సృజనాత్మక రంగాల్లో ప్రభుత్వం బలమైన విధానాలతో ముందుకు సాగుతోందని ఆయన అభిప్రాయపడ్డారు. నాగార్జున మాట్లాడుతూ, అన్నపూర్ణ స్టూడియోస్ తన తండ్రి ఆకినేని నాగేశ్వరరావు చూపిన దారిలోనే ప్రపంచస్థాయి ఫిల్మ్ మేకింగ్, ఫిల్మ్ ఎడ్యుకేషన్ వైపు ప్రయాణిస్తున్నదని తెలిపారు. విద్యార్థుల ప్రతిభకు ప్రభుత్వ, పరిశ్రమల మద్దతు లభిస్తుండటం హర్షించాల్సిన విషయమని పేర్కొన్నారు. సృజనాత్మక రంగాన్ని బలోపేతం చేసే దిశగా తెలంగాణ ప్రభుత్వం తీసుకుంటున్న నిర్ణయాలకు నాగార్జున కృతజ్ఞతలు తెలిపారు. ఫిల్మ్ మేకింగ్, విజువల్ మీడియా, డిజిటల్ కంటెంట్ సృష్టిలో తెలంగాణ యువత దేశంలో ముందంజలో నిలిచే రోజులు దూరం కావని అన్నారు.
అన్నపూర్ణ ఫిల్మ్ అండ్ మీడియా కళాశాలలో తెలంగాణ ఉపముఖ్యమంత్రికి స్వాగతం
RELATED ARTICLES
